Гандлёва-эканамічнае супрацоўніцтва

У 2021 годзе двухбаковы гандлёвы тавараабарот склаў 62,68 млн. даляраў. Беларускі экспарт у Егіпет склаў 41,77 мільёна даляраў, імпарт – 20,91 млн. даляраў.

Дынаміка гандлю Рэспублікі Беларусь з Егіптам, (млн. даляраў)

Беларусь экспартуе ў Егіпет трактары, грузавыя аўтамабілі, дарожную і будаўнічую тэхніку, аўтапагрузнікі, рухавікі ўнутранага згарання, шыны, металавырабы, оптыку, сухое малако, помпы, рэнтгенаўскае абсталяванне, прадукцыю нафтахіміі і дрэваапрацоўкі.

Імпарт з Егіпта ў асноўным складаецца з цытрусавых пладоў, свежай, кансерваванай і замарожанай гародніны і садавіны, лекаў, раслін, якія выкарыстоўваюцца ў парфумерыі і фармацэўтыцы, верхняй вопраткі, тканін, поўсці.

Вядучымі экспарцёрамі беларускай прадукцыі ў Егіпет з'яўляюцца ААТ «Беларускі металургічны завод», ААТ «Мінскі трактарны завод», ААТ «Мінскі аўтамабільны завод», ААТ «Амкадор», УП «Адані», канцэрн «Белнафтахім».

Створана сумесная вытворчасць грузавых аўтамабіляў «МАЗ» на базе кампаніі «Helwan Machinery and Equipment» Міністэрства ваеннай прамысловасці Егіпта, адчынена зборачная лінія дарожна-будаўнічай тэхнікі ААТ «Амкадор». Вядзецца праца па стварэнні зборачных ліній беларускіх трактараў, дызельных рухавікоў, аўтобусаў з газавымі рухавікамі, збожжасховішчаў, сельскагаспадарчай тэхнікі.

У Егіпце дзейнічае прадстаўніцтва ААТ «МАЗ».

Беларускія прадпрыемствы рэгулярна бяруць удзел у міжнародных выставах, якія праводзяцца ў г.Каіры, у тым ліку выставе сельскагаспадарчай тэхнікі і абсталявання «Сахара», выставе прадуктаў харчавання «Фуд Афрыка».

Беларусь і Егіпет актыўна ўзаемадзейнічаюць у рамках інстытуцыйных гандлёва-эканамічных органаў.

У верасні 2019 г. у г.Мінску адбылося шостае пасяджэнне Беларуска-Егіпецкай сумеснай гандлёвай камісіі. У лютым 2020 года ў г.Каіры арганізавана першае пасяджэнне Беларуска-Егіпецкага Савета дзелавога супрацоўніцтва. У лістападзе 2018 года ў сталіцы Егіпта адбылося другое пасяджэнне Беларуска-Егіпецкай рабочай групы па прамысловасці.

Сфарміравана Беларуска-Егіпецкая група па супрацоўніцтве ў сферы сельскай гаспадаркі, першае пасяджэнне камісіі адбылося ў ліпені 2020 г. у фармаце відэаканферэнцыі.

У Рэспубліцы Беларусь зарэгістравана 9 прадпрыемстваў са 100-працэнтным егіпецкім капіталам і 12 сумесных беларуска-егіпецкіх прадпрыемстваў.

З мэтай развіцця міжрэгіянальнага ўзаемадзеяння падпісаны пагадненні аб пабрацімскіх сувязях паміж г.Мiнскам і г.Каірам, Мінскай вобласцю і губернатарствам Паўднёвы Сінай.